Maitang Production Bodol songcha Tripura hasteni Entertainment base Production House. O bodol bisi brum brumno dalbidal hoda hamkraini samung bwtangbai baksa alaida khwlaiwi rwchapmung, mwsamung tei toke akorogbo swnamwi lukurogno khatungma rwui tongo.
Tini tangsalo Tripura Tribal Area Autonomous District Council(TTAADC) CEM Runiel Debbarma, Education Departmentni adong C.K Jamatia tei Chairman Bhaba Ranjan Reangno borom yapharlaikha Production ni adongrog.
A salo Production ni wngwi puila TTAADC CEM Runiel Debbarmabai malaikha. Bodolni wngwi memorandum yapharlaikha.
- TTAADC ni aarie noh, srai-srai khe Demarcation khwlaiwi aarie bona tei oh-aarie ni lam-o, lamsogmani tei nairukmani signboard rok rijakna eba sunamjakna wngthun.
- TTAADC ni thai-o tongnai lukurok, jani-ja thaini mung khwlai mannani, oh-raida TTAADC hapang ni yaktwi wngnani sep mana wngthun.
- Toke swnammani, mwsamani swrwngna bagwi institute eba workshop rok TTAADC hapangni bwkhaktui sunamjakna eba songchajakna wngthun.
- Kubuni haste-o, 6th schedule area ni bisingo Prasar Bharati tongma hai TTAADC ni bwkhaktwibo oh-sep-sab mana wngthun.
- TTAADC hapangni bwkhaktwi, kothoma, koktang, koklob, rwchapmung swinai rwchapmung swnamnai eba tamnai, rwchapnai toke swnamnai, mwsanai kwrwngrogno bisi-o waisa borom yapharjakna wngthun pandani bisingtwi.
- Laithangjak bisirogo ICT Dept. (TTAADC) ni bwkhaktwi swnamjak tokerokno censorship naharna bagwi yapri romjakno dakti-dakti khwlai tabukni hapangni bisingtui khwlaijak-na wngthun.
- TTAADC ni bisingo, Kaisa Kotor Khe phuwarjak sakham naimani nok joto lukurokni bagwi swnamui tisana wngthun.
- Dal-bidal amjokma-bataimung (compelative-exams) rok ni bagwi swrwngthai coaching eba center phiyokjakna wngthon.
- Cherai rok ni bagwi thwngrwng nok, thwng nokhla tei thwngmani manwi rok manthokrina wngthun. Obono karwibo Kaisa zonal ni bisingo park tei Kaisa open gym joto ADC village council ni bisingo swnamui tisana wngthoon.
- Yago samung kwrui eba ajimung lam kwrwi rok ni bagwi dal-bidal skill development rung surung-mani rungnok rok swnamwi tisana wngthun tei TTAADC haphang ni dal-bidal department-o bukcha thaio sebuk naharna wngthoon srai-srai amyokmung ni bisingtwi bethenai tei kwplai wngnai rokno sep rijakna wngthun.
Abono karwibo Maitang Production Bodolni wngwi CEM Relief Fund o Rs 5,000/- yapharlaikha.
A salo CEM sakha, Bwskangni salo norogni bodolni wngwi memorandum yapharmarog baksato samung khwlaiwi tongo tei alaida khwlaiwi nangkukmarog daktino yapri naharjaknai.
Malaimao bodolni wngwi President Santa Debbarma(Actor), Secretary Debulal Tripura, Cashier Bindiya Debbarma, Nantu Debbarma, Parda Debbarma, Harendra Debbarma tei Gobin Debbarma.
